Presentamos esta mañá unha iniciativa para que se reparen os danos que hoxe existen no conxunto deste parque de Monte Alto

Hai xa meses que se eliminou a única papeleira que estaba ao carón do parque infantil: un parque que xa é de por si pequeno en comparación co grande que é a zona verde e ao que é imposíbel chegar polos sendeiros que hai construídos polo que hai que acceder a el atravesando o campo ou mesmo a lama cando vén de chover. Tamén é moi dificultoso o uso da zona de areeiro que en moitas ocasións aparece cheo de excrementos de cans e que debería atoparse valado

A nova sentenza sobre Nostián dános a razón en que a vía xudicial da lesividade era a correcta e en que eran precisas as auditorías previas para obter resolucións xudiciais favorábeis como a que se vén de facer pública

Lembramos que o Goberno municipal do PP atendeu á proposta do BNG de aprobar a declaración de lesividade do acordo de 2011 en marzo de 2015, toda vez que todas as súas anteriores estratexias fracasaran

Preguntamos ao Goberno da Marea Atlántica se ten pensado aplicar sancións ao propio Concello da Coruña polas súa pegadas de carteis

Tivemos coñecemento a través das redes sociais da imposición de sancións a membros do C.S. Gomes Gaioso pola pegada dun cartel na rúa da Torre polo que preguntámonos se o Goberno da Marea tamén aplica as mesmas sancións a todos os colectivos e empresas, mesmo multinacionais, que empregan ese mesmo muro para a colocación da súa cartelaría

Queremos que o Executivo local achegue unha relación das entidades ás que multou o ano pasado, e no que vai deste, polo incumprimento da Ordenanza de Xestión de Residuos Municipais e Limpeza Viaria e, así mesmo, se ten a intención, no que queda de mandato, de modificala; sería inexplicábel e intolerábel que a imposición de sancións dependa de quen coloca os carteis ou do que se publicita nos mesmos. O propio Concello da Coruña coloca carteis no mesmo muro onde foron sancionados os membros deste Centro Social, por non lembrar a cantidade de carteis que colocou en toda A Coruña durante a campaña #APéDeBarrio

Avanzamos o noso apoio á proposta de moción da A.VV. Oza Gaiteira Os Castros para que o Concello da Coruña amose publicamente o rexeitamento á construción dunha Planta de pretratamento de aceites industriais e hidrocarburos no Peirao de Oza

Cualificamos como de “despropósito” que a Consellaría de Beatriz Mato pretenda instalar na bocana da Ría do Burgo esta Planta tendo xa presentado unha batería de iniciativas no Parlamento de Galiza para impedir a construción desta infraestrutura

A instalación prevese nunha localización a menos de 500 metros de bancos de produción marisqueira, ao carón de sendas praias (Oza, Santa Cristina e Bastiagueiro), ao carón dun complexo náutico deportivo, dentro do conxunto urbano do barrio de Oza, asiduamente atacado por ser a zona dos peiraos da Coruña onde se teñen desenvolto actividades altamente contaminantes, causantes dunha contrastada polución medioambiental, como descargas de carbón e outros materiais, e por existir desaugues ou canalizacións que teñen producido filtracións e verteduras de hidrocarburos. Basta xa de ataques medioambientais á nosa ría e ao barrio de Oza. Imos esixir xunto coa Asociación de Veciños Oza Gaiteira Os Castros a retirada inmediata do proxecto

Presentamos unha batería de iniciativas no Parlamento galego para impedir a construción desta Planta de tratamento de aceites e hidrocarburos na bocana da Ría do Burgo

A autorización da Xunta de Galiza para a instalación desta planta de almacenaxe e pretratamento de aceites industriais e hidrocarburos no Peirao de Oza da Coruña asemella outra das actuacións sen sentido ás que nos ten afeita a Consellaría de Medio Ambiente e Ordenación Territorial, amosando, asemade, o seu total desprezo para co medio ambiente nunha contorna constantemente agredida como a da Ría do Burgo

Pese ao informe técnico do Departamento de Xestión Enerxética e Residuos Urbanos do Concello da Coruña, recollendo as indicacións da Ordenanza Municipal de Vertidos e do Servizo Municipal de Saneamento, no que se indicaba que este proxecto «pode causar impactos ambientais significativos e que se trata dunha zona de sensibilidade especial», e recomendaba establecer medidas adicionais a considerar antes da aprobación do proxecto que «debería ser obxecto dunha avaliación ambiental ordinaria, e non simplificada», finalmente a Consellaría de Beatriz Mato decidiu seguir para adiante co proxecto, o que evidencia o que lle importa a cidade á futura candidata do Partido Popular

Insistimos en reclamar a necesidade de expoñer ou realizar cantos informes sexan precisos que avalen a idoneidade para consumo humano das augas do lago das Encrobas así como o nulo impacto medioambiental da obra.

Esiximos do Goberno municipal que aclaren o por que do interese de EMALCSA en realizar as obras e como se pensan financiar

Nunca avalaremos este transvase mentres non estean claros aspectos fulcrais do mesmo: a calidade óptima das augas para consumo humano, a afectación ás contornas LIC, as empresas e administracións implicadas e/ou beneficiadas e a realización dun estudo da evolución das necesidades de auga para a Comarca coas actuacións prioritarias que se deberan resolver, entre as que por certo, nós non consideramos a obra do transvase

Presentamos no Parlamento galego unha batería de iniciativas co obxecto de paralizar a construción da planta de residuos industriais de Santa Icía

Dimos traslado dunha Interpelación, de sendas proposicións non de lei e de preguntas á Consellaría de Medio Ambiente para a súa resposta oral e por escrito

Entendemos que a contestación veciñal e social é un clamor, téndose xa posicionado de xeito unánime a veciñanza e todas as entidades e asociacións da contorna en contra da construción da Planta polo que insistimos en considerar que a construción da infraestrutura está totalmente inxustificada e advertimos que non quedaremos impasíbeis ante a posibilidade de que a Xunta de Galiza pretenda seguir adiante co proxecto

Rexistramos a alegación tipo elaborada pola A.VV. de Morás e que varias entidades están empregando para presentar a reclamación en contra da Planta no proceso de participación para a avaliación ambiental de proxectos iniciado pola Consellaría de Medio Ambiente

Tamén denunciamos que a páxina web habilitada pola Xunta para presentar as alegacións dá erro cada vez que se quere presentar unha reclamación polo que só a presentación por escrito e por rexistro é a única fórmula para realizar o procedemento

Presentamos unha iniciativa para que o Concello da Coruña rexeite a Planta de tratamento de residuos industriais que a Xunta de Galiza está valorando construír en Santa Icía

Tamén demandamos do Goberno municipal que persoe ao Concello da Coruña no proceso de participación da Avaliación Ambiental de proxectos aberto pola Consellaría de Medio Ambiente e anímao a presentar cantas alegacións sexan oportunas para impedir a construción da planta

Onte á tarde, xunto con outras entidades e particulares, visitamos a zona, situada a menos de cen metros do termo municipal da Coruña, e comprobamos in situ os terreos onde se pretende construír a planta. A resposta de todos cantos participamos desta visita é unánime: nin está xustificada nin é lóxica a construción neste emprazamento, cuestión que o BNG xa advertiu a semana pasada no Pleno de Arteixo coa moción que presentamos e que foi rexeitada unicamente polo Partido Popular

Presentamos unha batería de iniciativas e propostas tras a visita a este barrio

Percorremos a zona acompañados por varias veciñas e veciños que nos indicaron as principais necesidades e demandas da zona así como a necesaria rehabilitación integral de espazos, rúas e prazas

A visita permitiunos facer un chequeo a fondo dos Rosais e trasladarmos propostas de actuación inmediata: no que ten que a ver con infraestruturas, conservación de vías públicas, parques e xardíns, zonas de xogos e mesmo abandono de determinadas zonas e elementos; con medio ambiente, para a reposición de árbores na praza Elíptica e de actuación para evitar o espallamento do eucalipto no Monte de San Pedro; con deporte, para a reparación do polideportivo dos Rosais etc

Avanzamos xa que tras as visitas deste mes ao barrio da Agra, ao mercado de Santo Agostiño e ao barrio dos Rosais, xa comezamos a tomar boa nota das propostas de investimentos que se deben reservar para os barrios nos próximos orzamentos municipais de 2018