Esta circunstancia leva o portavoz do BNG en María Pita Francisco Jorquera a rexistrar un rogo oral ao Executivo coruñés, para a súa lectura no Pleno axendado para o vindeiro xoves 9 de setembro.

“Que o Goberno Municipal poña fin á parálise da reforma do campo de Eirís e adopte as medidas necesarias para que as obras se inicien de inmediato”, así reza o texto desta iniciativa nacionalista.

Na exposición de motivos, Jorquera lembra que “a reforma do campo de fútbol de Eirís é un proxecto que arrinca do mandato anterior, financiado por Estrella Galicia, como compensación á ocupación do antigo campo Agrela 2 para ampliar a fábrica da cervexeira coruñesa”. As obras, entre outras actuacións, contemplan a ampliación do campo, a instalación de céspede artificial e a construción de vestiarios.

Ironiza Jorquera con que unha actuación que cualifica como “modesta” leve camiño de disputar o récord de promesas incumpridas e retrasos nas datas comprometidas "á tantas veces anunciada chegada do AVE a Galiza”.

“Unha situación que non é nova na zona, pois o mesmo ocorre co lindeiro complexo deportivo do Castrillón”, remarca o voceiro nacionalista.