Queixas fai este emprazamento ao Executivo coruñés a través dunha moción que defenderá no Pleno do vindeiro xoves.

Para abrir o Xardín do Observatorio é preciso derrubar primeiro os muros da rúa de Gregorio Fernández e da Canceliña, ben como acondicionar o espazo e construír un valo interior para delimitar a zona verde e o ámbito que ocuparía a delegación da AEMET.

E cando se faga non será sen tempo, porque o Xardín leva fechado tres anos e porque o Pleno da Corporación xa aprobou en xaneiro de 2023, a instancias do BNG, unha moción que instaba o Goberno Local a negociar co Ministerio de Transición Ecolóxica a apertura deste necesario espazo para un “barrio intensamente denso” e que adoece dunha total falta de zonas verdes accesíbeis, salienta na exposición de motivos.

Após ese pronunciamento do Pleno, a finais de marzo de 2023 o Goberno Local anunciou a sinatura dun acordo coa AEMT para habilitar no Xardín do Observatorio por volta de 5 mil metros cadrados de zona verde. Un convenio cunha duración de catro anos en virtude do cal o Concello “asumiría tanto o derrubo dos muros como o acondicionamento do espazo e a construción dun valo interior para delimitar o espazo da delegación da AEMET”.

Mais xa logo estamos a acabar o ano e o convenio continúa sen se aplicar, o que loxicamente causa malestar nunha veciñanza dun barrio que ten sufrido ao longo dos anos “un medre urbanístico absolutamente descontrolado”.

O Xardín do Observatorio debe ser reaberto canto antes, sen prexuízo de que se dean pasos decididos para no futuro o barrio contar cun Parque da Agra -loxicamente dunha extensión maior- merecente de tal nome, obxectivo polo que a veciñanza leva batallando desde hai décadas.