Esta foi a mensaxe que lle trasladou Francisco Jorquera, aos integrantes da Banda Municipal de Música, quen, co seu director, Juan Miguel Romero Llopis, ao fronte, recibiron no Coliseum o noso candidato á Alcaldía –acompañado pola número 2 da nosa lista, Avia Veira- antes de comezar un dos seus ensaios.

“É todo un privilexio que exista a Banda Municipal de Música da Coruña, con toda a súa calidade e a súa historia. Desde logo, a nosa intención, desde o Goberno Local a partir do próximo 28 de maio, é potenciala e visibilizala”, comprometeuse Jorquera coas músicas e os músicos da agrupación.

O BNG é perfectamente consciente das necesidades da banda, resaltaron Veira e Jorquera. “Neste mandato levamos unha moción ao Pleno, froito dun anterior encontro convosco e un compañeiro voso foi á Comisión de Cultura da que eu son presidente para lle explicar ao Goberno Local os problemas que enfrontades”, resaltou Avia Viera no seu diálogo coas e cos intérpretes.

“A moción foi aprobada no Pleno de novembro de 2020, mais infelizmente está aínda por se cumprir”, engadiu Jorquera.

As tarefas que asumirá o Goberno Local liderado polo BNG en relación á Banda Municipal de Música, esclareceu Jorquera, teñen a ver basicamente con dúas cuestións.

A primeira ten a ver coa falta de persoal. “A banda precisa dunha dotación de prazas suficiente para ir cubrindo baixas e xubilacións. Non pode ser que a falta de persoal provoque a suspensión de concertos e a imposibilidade de atender toda a programación prevista”, indica Jorquera.

O certo é que “a lexislación establece límites moi estritos para a contratación de persoal” nas administracións públicas, concedeu o candidato do BNG, mais “aplicar esas restricións sen a menor flexibilidade nunha entidade como a Banda Municipal de Música é sinxelamente ridículo”.

“Un administrativo”, exemplificou, “podes desprazalo de María Pita ás oficinas do Concello na Franxa. Mais un clarinetista, que é un virtuoso do seu instrumento, se se xubila ou ten unha baixa por enfermidade non pode ser substituído por un batería”.

A agrupación precisa tamén de reforzos administrativos. “Neste momento apenas tendes unha administrativa que asume funcións que sobardan por completo as propias do seu posto de traballo. A banda necesitaría da contratación dun/unha xerente/a que poda desenvolver tarefas xerenciais, para, entre outras encomendas, elaborar a programación anual”, considera Jorquera, para quen tamén sería preciso un/unha arquiveiro/a “para catalogar, dixitalizar e pór en valor os extraordinarios fondos documentais” da agrupación.

A segunda cuestión é a de lle dar unha maior “visibilidade” á banda, remarcou Jorquera. “O Concello ten un tesouro e, por tanto, teno que pór en valor, impulsando unha programación intensa para chegar a todos os recunchos da cidade e, por suposto, máis alá da Coruña tamén”.

“Somos coñecedores dos problemas que provoca a limitación de espazo en que tendes de ensaiar”, díxolles Jorquera ás músicas e músicos. “Tende a seguridade que o BNG é plenamente consciente de todos os vosos problemas e de que os hai que abordar coa maior urxencia. A Banda Municipal de Música é unha institución básica na creación e na difusión de cultura nesta cidade”, engadiu.

“É mágoa que teñamos na Coruña tanto potencial no eido da Cultura e que desde o Goberno Local non se saiba aproveitar, a comezar por entidades que dependen do propio Concello e que están no esquecemento e no abandono. Tendes o noso compromiso de que desde o Goberno Local faremos da cultura unha prioridade da nosa acción”, concluíu Jorquera.