DÍA DA PATRIA

Un Bando para o noso día: viva o Día da Patria galega!

Pancarta colocada en Compostela en 1968, ano da recuperación da celebración do Día da Patria
Pancarta colocada en Compostela en 1968, ano da recuperación da celebración do Día da Patria

Solicitámoslle ao alcalde da Coruña que redacte un Bando conmemorando o 25 de xullo Día da Patria galega

Por cuarto ano consecutivo demandamos que o Goberno municipal chame a participar á veciñanza da Coruña da festividade, xusto na véspera do centenario da instauración do día e no 50º aniversario da súa recuperación polas clases populares galegas

Un Bando para o noso día: viva o Día da Patria galega!

Vimos de lle solicitar ao alcalde da Coruña a redacción dun bando conmemorativo do 25 de xullo, Día da Patria galega.

Deste xeito, e por cuarto ano consecutivo, lembrámoslle ao Goberno municipal que foi precisamente en 1919 cando, nunha asemblea das Irmandades da Fala, fundadas na nosa cidade, as que resolveron que o día 25 de xullo fora declarado como o Día Nacional da Patria galega.

Capa da Nosa Terra, publicación das Irmandades da Fala, co gallo do Día da Patria en 1922

A través desta iniciativa (que podes descargala premendo aquí), insistímoslle en lembrar ao Executivo local que as Irmandades da Fala naceron na cidade e A Coruña, polo que se debe mostrar orgullosa deste fito e mais de pertencer a unha nación que se chama Galiza cunha rica cultura, cunha lingua e cunha historia que teñen que ser o motor do noso porvir, e de celebrar, coas máis altas distincións este día socializándoo con toda a veciñanza, e de celebrar que precisamente o ano que vén cumprirase os cen anos desde que o 25 de xullo é o noso Día Nacional

Asemade, este ano tamén cómprese o 50º aniversario da recuperación da celebración desta data, despois da súa prohibición na ditadura de Primo de Rivera, que por certo segue no rueiro da cidade, e despois do Golpe de Estado de 1936, a Guerra Civil e o xenocidio que o franquismo realizou na Galiza e no Estado español, xa que logo en 1968, forzas sociais, veciñais, culturais e políticas, nacidas do pobo, iniciaban un proceso que xa non puido ser parado: a toma da cidade vella de Compostela por parte das clases populares para recuperar para Galiza o seu 25 de xullo.

Así, demandamos que o alcalde da Coruña redacte un Bando celebrando o Día da Patria Galega, a publicar non principais medios escritos da nosa cidade o propio 25 de xullo, no que se resalte o papel fundamental que tivo a cidade da Coruña para instaurar esta data xa que as coruñesas e coruñeses temos un duplo motivo para festexala: o día en si e porque foi precisamente na nosa cidade, grazas ás Irmandades da Fala, onde se ideou a primeira declaración da festa que se conmemora.

A Coruña, 19 de xullo de 2018.