O Pleno do Concello da Coruña aprobou este xoves as mocións defendidas polo BNG en relación á Casa Cornide e a respecto do sector da hostelaría, un dos máis castigados pola pandemia. En troca, e ao recibir os votos contrarios do PSOE e a abstención do PP, a moción do BNG en favor da retirada do proxecto das Percebeiras foi rexeitada. Esta última moción asumía as demandas da Asociación de Veciñas e Veciños de Labañou, até o punto de que o texto a debate foi redactado integramente por este colectivo veciñal.

O Pleno do Concello da Coruña fixo esta mañá unha Declaración Institucional a prol da urxente posta en marcha do Plano de Dragaxe e Rexeneración da Ría do Burgo e tamén do establecemento de compensacións económicas para as mariscadoras e mariscadores durante o tempo en que, a consecuencia das obras, non podan desenvolver a súa actividade profesional.

No Acordo de Investidura asinado en xuño de 2019 o PSdeG comprometeuse co BNG a, no primeiro ano de mandato, darlle a mellor solución “legal e laboral posíbel” á situación das e dos traballadores das bibliotecas municipais tendo como horizonte a unificación da rede baixo a fórmula da xestión directa por parte do Concello (neste momento parte das bibliotecas prestan o seu servizo en réxime de concesión).

O BNG traslada ao Pleno deste xoves 1 de outubro unha iniciativa da Asociación de Veciñas e Veciños de Labañou sobre o proxecto das Percebeiras e faino en forma de moción asinada conxuntamente coa Marea Atlántica. O texto da moción foi integramente redactado polo colectivo veciñal.

O lema “Que nos devolvan o roubado” aínda está por se cumprir, por se tornar realidade, na cidade da Coruña. E é que inda está por se recuperar para o patrimonio público a Casa Cornide, unha xoia do barroco galego espoliada pola familia Franco nos anos 60 do pasado século coa colaboración necesaria das elites franquistas locais, desde os alcaldes Alfonso Molina e Sergio Peñamaría de Llano até o oligarca Pedro Barrié de la Maza.

O portavoz do BNG en María Pita, Francisco Jorquera, vai defender no Pleno do vindeiro xoves 1-O unha moción con propostas para aliviar a situación, en algúns casos desesperada, en que se atopa o sector da hostelaría, un dos máis castigados pola pandemia.

No acordo de investidura asinado por BNG e PSdeG en xuño de 2019 figuraba expresamente que a negociación dos orzamentos do Concello comezaría sempre no mes de setembro, co propósito de que puidesen entrar en vigor a principios de cada ano.