Malia que o venres 28 de abril saiuse cunha data a curto prazo para, por fin, seren aprobados definitivamente os orzamentos para 2017, lembramos a nosa advertencia ao Goberno municipal: avalaremos orzamentos só no caso de que exista un calendario para a aprobación dun modificativo para integrar as nosas achegas pactadas co Executivo local no proceso de negociación

Advertimos, por segundo ano consecutivo, da necesidade de comezar a elaboración dos orzamentos e os procesos de negociación coa antelación suficiente e coa altura de miras necesaria para non recaer no espectáculo bochornoso destes dous anos de cara aos orzamentos municipais de 2018

Despois da suspensión da Comisión de Facenda desta mañá no Concello da Coruña estamos nun “dèjá vu” permanente

É incríbel a posibilidade de que se poida repetir unha situación como a acontecida cos orzamentos de 2016 e entende que é un sinal inequívoco de que os demais grupos municipais non están polo labor de mirar polos intereses da cidade senón só polos seus

Tras as posturas amosadas pola Marea, PP e PSOE, e a incerteza amosada polo Goberno municipal ao non ter tomada unha decisión de como proceder a respecto da forma de aprobar ou rexeitar as reclamacións, non sabemos nin cando nin como se irá a Pleno, e coa posibilidade real de que se acabe aprobando un texto desequilibrado e con reparos da intervención. Volveremos ver un espectáculo bochornoso do que o principal culpábel é o Executivo local que non quere, non sabe ou no promove os mecanismos para chegar aos pactos necesarios para ter os orzamentos

O traballo e as nosas achegas ao proxecto de orzamentos municipais 2017 cobran máis valor polo que advertimos as demais forzas que deixen de mirarse o embigo e comecen a pensar na cidade

Votaremos a favor da aprobación definitiva dos orzamentos só no caso de que o Goberno Municipal garanta a inclusión das nosas achegas e o prazo para efectivizalas

A nosa portavoz Avia Veira presentou por rexistro está mañá unha solicitude formal para manter unha entrevista co alcalde para lle demandar esta inclusión nos orzamentos de 2017

Lembramos as palabras de Xulio Ferreiro no Pleno da Cuestión de confianza nas que amosaba o seu compromiso a “impulsar un modificativo de crédito para poder incluír as propostas do Bloque Nacionalista Galego” achegadas durante o proceso de negociación

Fixemos un traballo exhaustivo e rigoroso sobre as necesidades que ten cada barrio da cidade e os investimentos necesarios por áreas que se plasmou nunha alegación equilibrada que incluía minoracións e altas. Despois de reunírmonos co Goberno municipal pactamos finalmente unha emenda transacional. E desde logo non imos renunciar de balde a todo este traballo polo que esiximos que o Executivo local expoña publicamente como pensa dar encaixe a esa emenda, os prazos para facela efectiva e a garantía da execución final das nosas propostas

Non entendemos que case pasadas xa 3 semanas desde o remate do prazo para a presentación das emendas de carácter técnico aínda non exista unha previsión de temporalización para a súa aprobación definitiva

Tamén estamos agardando a que se nos comunique que prazos manexa o Executivo local para incorporar a nosa alegación, para cando quere realizar o modificativo de crédito onde se garantan os investimentos que foron aceptados no proceso de negociación e os prazos para executalos. Se finalmente son aprobados nunha data moi similar a do ano pasado, o 23 de maio, queremos garantía de que as achegas pactadas nese proceso sexan incorporadas de xeito inmediato

Hoxe cúmprense 3 semanas desde a celebración do Pleno onde se rexeitou a proposta de orzamentos de 2017. Cremos que xa é tempo para que o Goberno municipal mova ficha e de saber que prazos manexa xa que logo podemos atoparnos cunha situación similar á do ano pasado e non ter orzamentos até o mes de maio

Lembramos que no Pleno fixemos fincapé sobre as repercusións que supón o non ter uns orzamentos aprobados, nomeadamente sobre as asociacións e os investimentos necesarios nos barrios, e amosamos a nosa preocupación sobre o alongamento da situación actual sine die

De novo vémonos como o ano pasado co orzamento prorrogado mentres o PSOE e a Marea seguen sen resolver as súas problemáticas de parella

Entendemos que o Goberno local é quen ten a responsabilidade de elaborar o orzamento en tempo e non pode eludila xa que son os que teñen a “capacidade” e a obriga política de facelo mais decidiu facelo tarde sen deixar marxe temporal abondo para a negociación e para ter o orzamento listo e vixente a 1 de xaneiro de 2017

Emendamos os orzamentos municipais para 2017 para eliminar máis de 2 millóns de euros en gastos superficiais e investilos, entre outras cousas, nun Plan de Inclusión Social por valor de 500.000 euros, a eliminación do copagamento no Servizo de Axuda a Domicilio e a posta en marcha dun Plan de Industrialización para A Coruña con 250.000 euros

Conseguimos rebaixar máis de 2 millóns de euros en gastos superficiais: a partida destinada a retratos dos alcaldes, partidas en externalizacións ou partidas en publicidade e propaganda

Desde o Bloque entendemos que hai que priorizar o investimento nos barrios, cos que segue existindo unha débeda, para o cal achegamos máis de 145 propostas recollidas nas sucesivas Asembleas Abertas e encontros, mais tendo moi presente que existen outras tantas propostas da veciñanza que demandan que o Goberno municipal xestione mellor diariamente

Continuamos coa mesma liña do ano pasado, de sermos construtivas e achegarmos propostas concretas ao orzamento malia que tememos que ninguén aprendeu do acontecido no pleno de abril: nin o Goberno, que non nos fixo chegar o orzamento até finais de novembro e incompleto, nin os outros grupos da oposición cos que parece que non vai a cousa

Comezamos en Palavea, na tarde de onte, a primeira das asembleas abertas que desenvolveremos ao longo deste mes polos barrios da cidade para recoller as propostas da veciñanza aos orzamentos 2017

Avia Veira e David Pena atenderon á veciñanza que trasladou as súas propostas de actuación, entre outras, o asfaltado integral das rúas do barrio e construción de beirarrúas, a mellora dos servizos ofrecidos no centro cívico, co aumento de prazas nas actividades para dar cobertura á veciñanza do barrio, así como tamén a mellora dos servizos da asistencia social

Dentro das visitas programadas, temos previsto achegármonos este venres, a partir das 11.00 h, ao barrio da Silva acompañados por  veciñas e veciños do barrio

Realizaremos ao longo deste mes unha serie de asembleas abertas nos barrios da cidade para recoller as propostas de investimentos da veciñanza para os orzamentos municipais

Tamén visitaremos os barrios para comprobar a súa situación actual e contrastar coa veciñanza e comerciantes as principais necesidades

O noso obxectivo é comprobar as necesidades en todos os barrios e trasladar as propostas da xente que é quen mellor coñece as prioridades de onde empregar os cartos e no que hai que investir e traballar

E advertimos de que se teña aprendido da trapallada do Pleno de abril no que se aprobaron inicialmente os orzamentos de 2016 agardando que as prioridades do Goberno municipal, e dos grupos municipais do PSOE e PP sexan elaborar un orzamentos acorde as necesidades da Coruña