O Bloque Nacionalista Galego lanza unha ofensiva política para frear o ERTE anunciado por Repsol para a Refinaría da Coruña (atinxiría 212 traballadoras e traballadores, 31% do cadro de persoal). Así, no Concello o grupo municipal vai impulsar unha Declaración Institucional no vindeiro Pleno do 6 de maio, en tanto que no Parlamento galego a formación nacionalista defenderá unha proposición non de lei na sesión plenaria da cámara o próximo martes 4M.

O deputado do BNG no Congreso, Néstor Rego, reclámalle ao Ministerio de Traballo que investigue as causas alegadas por Repsol na planta de refinaría da Coruña para acollerse a un ERTE dunha duración previsíbel de 6 meses. A formación nacionalista destaca que a información dada pola empresa até o momento só fai referencia a causas de produción. Rego remarca que se estas non se acreditaren adecuadamente estaríamos perante un Expediente de Regulación Temporal de Emprego fraudulento.

O portavoz do BNG en María Pita, Francisco Jorquera, marchou esta tarde, canda as traballadoras e os traballadores da Refinaría de Repsol, nun percorrido que, iniciado e concluído nas instalacións industriais da empresa, transitou polo polígono de Agrela até completar un circuíto duns cinco quilómetros.