A Coruña, 2 de agosto de 2013.- O Grupo Municipal do BNG, Galiza Nova e Galiza, Mellor sen Touradas realizaron na mañá de hoxe un acto simbólico de apoio á manifestación antitouradas que terá lugar este domingo, 4 de agosto, con saída ás 12h do Obelisco. Así, Avia Veira, concelleira do BNG, Antón Freire, membro de Galiza Nova, e Rubén Pérez, do colectivo animalista, pegaron na rúa Santo André cartaces convocando á mobilización baixo a célebre frase de Castelao “Lástima de bois”.

En declaracións aos medios, a concelleira nacionalista puxo de manifesto que o subsidio público da feira taurina por parte do Goberno do Sr. Negreira representa “un auténtico insulto”, sobre todo, engadiu, nun marco de recortes de dereitos sociais e de encarecemento dos servizos públicos básicos. “Ao PP non lle treme a man á hora de darlle pola porta de atrás 90.000 euros ás touradas á vez que encarece o recibo da auga e o billete do bus, obriga as persoas usuarias da axuda a domicilio a repagar o servizo e recorta en igualdade, cultura e ensino”, denunciou.

Avia Veira, que lembrou que o BNG votou en contra da celebración da feira taurina no Padroado do IMCE cando tiña responsabilidades de goberno, criticou que o PP “queira seguir adiante si ou si coas touradas e non lle importa que a empresa concesionaria incumprira as condicións do contrato, como o prazo de presentación do cartel”.

A concelleira do BNG sinalou que “a cidadanía non entende que o Concello siga subsidiando que os touros morran afogados polo seu propio sangue” e advertiu de que “só un 3% das galegas teñen manifestado interese polas touradas”. “O Concello da Coruña non ten que financiar este tipo de actos que, ademais de ser cruentos, carecen de apoio social e nada teñen a ver coa cultura do noso país”, engadiu Avia Veira.

“O Sr. Negreira mete cartos públicos nas touradas á vez que a mocidade emigra ou malvive con empregos precarios”

Na mesma liña, Antón Freire, membro de Galiza Nova, cualificou de “cachondeo” que o Goberno municipal se afane en subsidiar “este espectáculo macabro” á vez que “a mocidade se ve na obriga de emigrar ou malvive con empregos precarios”.

Sinalou, ademais, que Galiza Nova “está en contra deste maltrato animal que asimila a cultura española” e esixiulle ao Goberno municipal que desenvolva unha oferta de lecer que teña en conta a mocidade e que aposte pola cultura galega e a educación en valores, que nada teñen que ver coa tortura e coa crueldade dos animais.

Galiza, Mellor sen Touradas denuncia persecución

Pola súa banda, o responsábel de Galiza, Mellor sen Touradas, Rubén Pérez, advertiu da persecución que sufriron activistas do colectivo cando pegaban cartaces en apoio á manifestación do domingo durante a pasada noite. Foron seguidos, sinalou, pola furgoneta da empresa que coloca os cartaces da feira taurina.

Rubén Pérez salientou que os cartaces das touradas desaparecen “grazas a unha desobediencia civil masiva”. “A cidadanía non quere que se subsidien as touradas nin quere ver na Coruña espectáculos aberrantes coma este”, concluíu.