A Coruña, 30 de setembro de 2014- O Grupo Municipal do BNG denuncia o “mes horribilis” que está a padecer o barrio dos Castros debido á emisión de partículas en suspensión PM10, que mide a calidade do aire no porto de San Diego e que lle provocan afeccións respiratorias e de alerxia á veciñanza. As nacionalistas sinalan que se setembro empezou mal a nivel de emisión de partículas en suspensión –con medias diarias que foron de 42 µg/m³ o día 1, de 54 µg/m³ o día 2 e de 41 µg/m³ o día 3- remata peor. E é que só o venres, durante a mañá, chegaron a rexistrarse picos de 229 µg/m³, e o sábado, de 127 µg/m³, segundo a páxina web da Autoridade Portuaria.

Estes dous picos do venres e do sábado tiveron lugar ás 11h. E, precisamente, no día de onte, a web da Autoridade Portuaria deixaba baleiro o dato horario das 11h na táboa de emisións por datos horarios. Á vista destes datos, o Grupo Municipal do BNG pregúntase que está a acontecer no porto ás 11h dos últimos días e por que motivo a web da Autoridade Portuaria oculta o dato das 11h de onte.

Estas cifras preocupantes súmanse ás reiteradas desaparicións da web da Autoridade Portuaria dos rexistros das emisións horarias en determinados días. As nacionalistas esperan que a ausencias de datos non sexa ningunha acción premeditada da Autoridade Portuaria, pois, daquela, cabería esperar calquera tipo de manipulación dos datos de cara a realizar as medias anuais, tendo en conta que o Real Decreto 102/2011 estabelece que non poden superarse os 50 µg/m³ en máis de 35 veces ao ano.

O BNG ten presentado infinidade de iniciativas sobre a emisión de partículas en suspensión PM10 no porto e ten expresado publicamente á súa preocupación sen que o Goberno do Sr. Negreira teña feito nada ao respecto. A actitude cómplice do alcalde coa Autoridade Portuaria demostra que o Sr. Negreira está máis preocupado por coidar dos negocios do Porto que pola saúde dos veciños e veciñas dos Castros.

As nacionalistas, que van levar ao Parlamento europeo as denuncias da asociación veciñal Oza-Gaiteira-Os Castros co fin de exixir medidas que garantan a calidade do aire, exixen que as descargas de graneis se realicen en circuítos pechados sempre e cando sexa posíbel.