A avaliación do BNG é que o Goberno Local non está a atender as necesidades culturais da cidade.

“Somos unha cidade creativa en moitos ámbito –o audiovisual, as artes escénicas e plásticas, a literatura, a música...- e a cultura na Coruña exprésase en diferentes planos –o profesional, o afeccionado, o do tecido asociativa. Dispomos tamén de boas infraestruturas municipais e públicas nas que podemos facer e expoñer as nosas creacións... Mais temos un problema nada menor: o Goberno Local non está a ser o aliado que os sectores culturais necesitan”, considera Avia Veira.

A concelleira denuncia que desde o Goberno Local non se está a establecer o necesario diálogo cos distintos axentes culturais da cidade. “E é mágoa porque ese diálogo é imprescindíbel, pero o que vemos é que está paralizada a creación do Consello Municipal de Cultura e vemos tamén que tampouco está a funcionar o Concello nin como dinamizador nin como apoio nin como facilitador do desenvolvemento cultural da nosa cidade”, engade.

Desde o BNG, argúe, vemos a cultura como “un ben de primeira necesidade e como un dereito cidadán”, mais tamén como un sector económico do que viven moitas persoas. Un sector “abandonado” pola Xunta, especialmente durante a crise pandémica. “Infelizmente, tamén está a ser abandonado polo Goberno Local, que nin sequera toma boa nota das iniciativas do BNG, varias delas aprobadas en Pleno”, acrecenta.

“Faltan iniciativas, ideas, atención, coidado e cariño cara aos axentes culturais da cidade. É por iso que queremos que no Pleno o Goberno Local faga avaliación da súa política e unha análise da situación da cultura na nosa cidade. Aínda está a tempo de rectificar no que fica de mandato”, conclúe Veira.