Esta é a lóxica que anima o portavoz do BNG en María Pita, Francisco Jorquera, a levar ao Pleno do vindeiro xoves unha moción que pretende outorgar ao Concello un rol decisivo no deseño de políticas que permitan superar esta situación.

En concreto, o BNG insta o Goberno Local a que impulse a creación dun Consello Económico e Social como foro de diálogo e consulta permanente cos axentes sociais e a que, ao tempo, elabore un Plan de Desenvolvemento Económico Comarcal “de xeito dialogado cos restantes concellos da área metropolitana, outras administracións, axentes sociais e a UDC”.

A pandemia da Covid19 fixo que saísen á tona, argúe Jorquera, todas as feblezas da estrutura produtiva da cidade, “froito da súa excesiva dependencia do sector servizos, o máis exposto ás secuelas económicas desta crise sanitaria”.

Así as cousas, e alén das medidas urxentes que cabe aplicar canto antes para paliar as consecuencias socio-económicas da pandemia, cómpre tamén traballarmos no “deseño dunha estratexia de futuro que aborde os problemas estruturais da economía da nosa cidade e a súa comarca”, di Jorquera.

A pandemia da Covid19 fixo que saísen á tona, argúe Jorquera, todas as feblezas da estrutura produtiva da cidade, “froito da súa excesiva dependencia do sector servizos"

Concede o portavoz nacionalista que “este obxectivo vai alén das competencias da institución municipal”, porén entende que si cabe ao Concello, na súa calidade de “institución representativa de todas as coruñesas e coruñeses”, desempeñar “un papel indutor e asumir o liderado para impulsar este proceso”.

E nese contexto é onde debe xogar un papel relevante o Consello Económico e Social cuxa creación foi acordada polo BNG e o PSdeG-PSOE nunha reunión da Comisión de Seguimento do seu Acordo de Investidura realizada en outubro de 2019.

Desde aquela altura o Goberno Local non deu pasos concretos para materializar ese compromiso, máis unha razón que empurra o BNG a trasladar esta cuestión ao Pleno deste xoves.

De resto, a moción avanza algúns dos puntos sobre os que, a xuízo da formación nacionalista, tería de gravitar o deseño dunha estratexia de economía de futuro para A Coruña, e nomeadamente entre eles a renovación e diversificación do sector industrial, o respaldo decidido á investigación e innovación, a revitalización e modernización do pequeno comercio, a promoción dunha imaxe de marca asociada á calidade dos nosos produtos do mar, a potenciación dos usos produtivos do porto, a proxección da Coruña como referencia mundial da moda galega e o impulso da economía verde, vencellada á posta en valor dos produtos da terra, o consumo responsábel e a revitalización do comercio de proximidade.