UNHA MEDIDA QUE O BNG VIÑA RECLAMANDO CON INSISTENCIA DESDE HAI SEMANAS

O BNG celebra que o Concello tomase a decisión de intervir a planta de Nostián

Planta de residuos de Nostián
O grupo municipal do BNG celebra que o Goberno Local decidise hoxe proceder a intervir a planta de Nostián. Esta é unha medida que a formación nacionalista leva semanas propondo, como a forma máis adecuada de responder ás actitudes chantaxistas dunha empresa concesionaria, Albada, que en todo momento mostrou a súa disposición a utilizar como reféns as e os traballadores de Nostián e os concellos do Consorcio das Mariñas.
O BNG celebra que o Concello tomase a decisión de intervir a planta de Nostián

Este mesmo luns, o portavoz do BNG, Francisco Jorquera, afirmou nun debate na Radio Galega que, unha vez que Albada notificara o ERTE ao cadro de persoal, xa se daban todas as condicións para o concello intervir a planta en aplicación do prego de condicións. O Concello non podía ficar de brazos cruzados perante este ataque aos dereitos das traballadoras e os traballadores e ante a constatación de que a empresa ten a determinación de a partir do 1 de xaneiro deixar de prestar servizos aos concellos do Consorcio das Mariñas. "Xa non estamos ante anuncios. Estamos ante feitos. E ante estes feitos o Concello debe reaxir", afirmou Jorquera.

"A intervención é a solución que o BNG viña demandando desde hai semanas, como a viñan demandando tamén as e os traballadores da planta, en folga desde hai unha semana e a quen, reiterámolo, trasladamos a nosa solidariedade", di o portavoz nacionalista, para quen é "imprescindíbel" que "ante prácticas chantaxistas" de empresas que "vampirizan servizos públicos esenciais" o Concello teña unha posición de firmeza.

"Esperamos que a decisión tomada hoxe marque unha liña de actuación por parte do Goberno Local perante este tipo de prácticas", concluíu Joquera.
 

O BNG celebra que o Concello tomase a decisión de intervir a planta de Nostián