Aprobada por unanimidade a moción do BNG que pide anular as quitas ás preferentes e subordinadas

Aprobada por unanimidade a moción do BNG que pide anular as quitas ás preferentes e subordinadas

A Coruña, 6 de xuño de 2013.- O Pleno da Corporación Municipal aprobou esta mañá, por unanimidade, a moción do BNG que pedía a anulación das quitas ás persoas afectadas pola estafa das preferentes e subordinadas a través da modificación da Lei 9/2012, de 14 de nove novembro, de reestruturación e resolución de entidades de crédito. Así, a instancias do Grupo Municipal do BNG, o Pleno emprazará o Congreso dos Deputados a modificar esta normativa e adoptará as medidas oportunas para instar a todas as Administracións a levar a cabo unha solución satisfactoria á fraude das preferentes e subordinadas, unha solución que debe pasar, necesariamente, pola devolución íntegra do nominal investido nestes títulos, sen que se apliquen rebaixas ou descontos de ningún tipo.

A moción aprobada esta mañá por unanimidade do Pleno da Corporación é exactamente idéntica á proposición de lei do BNG aprobada no Pleno do Parlamento de Galiza o 28 de maio de 2013 e tombada, o mesmo día, polo PP no Congreso dos Deputados, feito que puxo en evidencia as contradicións partido do que é responsábel provincial o Sr. Negreira. Paradoxalmente, o alcalde da Coruña estaba en Madrid o 28 de maio, xusto cando o PP votaba si á proposición de lei do BNG no Parlamento galego e votaba non á mesma proposición de lei do BNG no Congreso dos Deputados.

A concelleira María Xosé Bravo, que defendeu a moción das nacionalistas, sinalou que esta iniciativa, que incorpora, como anexo, o corpo articulado da proposición de lei, ten como finalidade resolver de maneira xusta o gravísimo problema da estafa das preferentes. Sinalou que miles de persoas están a ser vítimas dunha estafa bancaria e están a ser vítimas de leis e actuacións do Goberno e do PP, empeñados en defender os intereses da banca. A concelleira do BNG afirmou que as xustas reivindicacións dos afectados deben levar á rectificación e revisión da actuación do Partido Popular, de xeito que non asuman perdas. Sobre todo, nos casos, que son maioría, nos que as persoas afectadas son aforradores sen historial de investimentos arriscados nen formación financeira.

María Xosé Bravo insistiu en que a solución á estafa ten que pasar pola devolución íntegra dos aforros, sen rebaixas ou descontos de ningún tipo e en cartos líquidos, non en produtos financeiros. Lembrou que “até a Comisión Nacional de Valores fala de mala práctica na venda, mais o Partido Popular teima en facerlles pagar unha grande estafa bancaria ás que son as vítimas.” E engadiu que “as quitas son unha expropiación forzosa, están facendo pagar a toda a cidadanía os desmáns da banca”.

A concelleira do BNG fixo alusión aos deputados galegos do Partido Popular que votaron, en Madrid, a favor da lei que estabelece este roubo. Salientou que o até hai uns meses concelleiro do PP na Coruña, Juan de Dios Ruano, número 5 da lista coa que o Sr. Negreira concorreu ás eleccións municipais, tamén apoiou a normativa das quitas. Precisamente, no Pleno ordinario de maio, o PP tombaba a moción do BNG para declarar “persoas non gratas” os deputados e deputadas que aprobaron a quita das participacións preferentes.

Aprobada por unanimidade a moción das persoas traballadoras de Teleperformance

Tamén foi aprobada por unanimidade a moción conxunta presentada a instancias do Comité de Empresa de Iberphone SAU, Teleperformance, unha iniciativa insuficiente, a ollos do BNG, que xa no anterior Pleno formulara un rogo oral para evitar os despedimentos. O portavoz nacionalista, Xosé Manuel Carril, sinalou que a moción “debería de ir máis alá, porque se a empresa despide é porque lle deixan”. Así, cargou, duramente, contra as reformas laborais regresivas, que lles “permites ás empresas facer o que lles dá a gana e que facilitan os despedimentos”.

Carril, que acusou o PP de ser hipócrita e un partido “neocom”, comparou os concelleiros do Goberno municipal cos verdugos das películas de capos que lle dan un tiro nas costas á vítima e que, aínda así, van ao enterro e lle dan unha palmadiña nas costas ás familias. “Son vostedes uns populistas”, salientou o nacionalista.

No día de hoxe, tamén se aprobou, por unanimidade, na Comisión de Economía do Parlamento de Galiza a proposición non de lei do BNG para garantir o mantemento dos 105 postos de traballo en Teleperformance.

O BNG apoia a moción para anular o convenio do cárcere e pide que se pida a reversión dos terreos e que o Estado se faga cargo do seu mantemento

Pola outra banda, o Grupo Municipal do BNG tamén deu o seu apoio á moción presentada polo Partido Popular para anular o convenio leonino asinado no 2005 por Paco Vázquez con Institucións Penarias en relación ao edificio que albergaba o antigo cárcere provincial. O portavoz nacionalista, Xosé Manuel Carril, lembrou, na súa intervención que o convenio “vazquiano” non contou co apoio do BNG cando foi ratificado na sesión plenaria de decembro de 2005 e que mesmo fora obxecto dun voto particular por parte das nacionalistas, pois signficaba unha perda económica logo de darlle os terreos.

Carril sinalou que unha vez ficou inoperativa a prisión provincial, tras o plan de renovación de Institucións Penintenciarias, Paco Vázquez optou por asinar este convenio que recollía unha permuta de terreos que supuxo que o Concello saíra perdendo e lle debera ao Estado 1.122.772 euros. “O normal sería que o Concello pedira entón devolución dos terreos, xa que a compra estaba condicionada ao uso do cárcere”, afirmou.

O portavoz nacionalista, que chamou a atención sobre o feito de que, unha vez máis o Goberno municipal omitira o nome de Paco Vázquez, puxo de manifesto que a moción debería de contemplar a solicitude da reversión do cárcere e a que se obrigue o Estado, responsábel da situación actual do antigo cárcere provincial, a asumir os gastos de reparación, mantemento e conservación do edificio.

O PP tomba a moción do BNG en defensa do aborto libre e gratuíto e para a restitución do COF do Ventorrillo

Pola outra banda, a moción do BNG sobre o aborto foi tombada polo Partido Popular. Nesta iniciativa, o BNG pedía instar a Xunta de Galiza a que demandase do goberno do Estado manter e aplicar a actual lei do aborto e a pór en marcha as medidas necesarias para garantir que, en todas as áreas sanitarias, os hospitais públicos galegos atendesen a demanda existente de realización de interrupcións voluntarias de embarazo cos seus medios propios, coa finalidade de garantir a igualdade no acceso a esta prestación.

Ademais, reclamaban emprazar o SERGAS a trasladar a xinecóloga que está a prestar atención sanitaria no Hospital Materno Infantil unha tarde á semana ás instalacións do COF do Ventorrillo e que aumentase o seu horario a tempo completo para garantir unha atención integral á saúde sexual e reprodutiva das mulleres. Tamén demandaban que a Xunta de Galiza garantise que a información que reciben as mulleres con carácter previo ao consentimento da interrupción voluntaria do embarazo for obxectiva, que puxer en marcha unha campaña de formación e información sobre métodos anticonceptivos, fundamental para evitar embarazos non desexados e prácticas sexuais de risco, e que o Concello desenvolver unha campaña institucional de información e divulgación sobre a Lei orgánica 2/2010, do 3 de marzo, de saúde sexual e reprodutiva e da interrupción voluntaria do embarazo, en que se informe ás mulleres dos recursos cos que contan para interromperen voluntariamente o embarazo.

O PP impide que o fútbol feminino teña presenza no trofeo Teresa Herrera

O PP tampouco permitiu debater a moción do BNG que instaba o Concello da Coruña a emprazar o R.C. Deportivo a introducir no cartel do trofeo Teresa Herrera o fútbol feminino, o grande esquecido desta disciplina.

A iniciativa, elaborada a instancias da Asociación de Xogadoras de Fútbol, coa colaboración de Mudegá (Mulleres Deportistas Galegas), tiña como obxectivo que o Concello da Coruña promovese o medre do fútbol feminino nunha sociedade que segue a ser machista. O avance en licenzas e clubs do fútbol feminino, advertiron as nacionalistas na moción, non se acompaña do recoñecemento social correspondente.

Rogo oral para garantir a seguridade no Birloque

Ademais das mocións, o Grupo Municipal do BNG formulou un rogo oral para que reclamar que o Goberno municipal garanta a seguridade física das persoas que viven no Birloque, adoptando as medidas que sexan necesarias para acabar cos problemas viarios que sofre o barrio. En concreto, a instancias da AVV Os Anxos, o Grupo Municipal do BNG pediu que o Goberno municipal adopte as medidas oportunas para que os semáforos da contorna do cruzamento da Avenida de Glasgow con San Cristovo funcionen de xeito coordinado, para que se sinalicen correctamente e se constrúan redutores físicos nos pasos de peóns de Salgado Torres e da Avenida de San Cristovo á altura Pablo Picasso con Glasgow e para que, neste tramo e nesta contorna, a velocidade se regule e se controle a non máis de 30 km á hora.

Tamén instaron o Goberno municipal a informar por escrito a AVV Os Anxos e a veciñanza do barrio do Birloque da data en que van rematar as obras e como vai quedar estruturada a zona, mediante planos explicativos.

 

Aprobada por unanimidade a moción do BNG que pide anular as quitas ás preferentes e subordinadas