“Esta reunión chega tarde. Xa o denunciamos no Pleno do Concello realizado o pasado 2 de febreiro. É incríbel que a alcaldesa non tivese un contacto cos alcaldes do Consorcio das Mariñas antes de presentar o proxecto da nova planta de Nostián”, afirma o voceiro do BNG e candidato á Alcaldía, Francisco Jorquera, como avaliación do encontro habido hoxe entre Inés Rey e os alcaldes do consorcio.

O portavoz do BNG no Concello, Francisco Jorquera, anunciou esta mañá, en conferencia de prensa, que no Pleno do vindeiro 2 de febreiro a formación nacionalista inquirirá a alcaldesa que fixo para, na tramitación da nova Lei de Residuos, defender o modelo coruñés de xestión e tratamento de lixo, o modelo húmido seco.

O modelo húmido seco consiste en que a separación dos residuos se fai nas instalacións da planta de Nostián. O que se pretende agora é que sexan as e os cidadáns quen fagan a separación. Problema: que iso conleva ubicar un novo contedor nas rúas, o quinto, e que, segundo todos os expertos, se vai reciclar moito menos.

A alcaldesa argumenta que a lei está para ser cumprida. Mais oculta que a nova norma permite exceptuar aqueles casos en que, como o da Coruña, a recollida conxunta (modelo Nostián) sexa mellor e menos custosa que a recollida seprada. E oculta tamén que Córdoba si solicitou que o Goberno recoñecese a súa excepción. E conseguiuno, cousa que o Executivo coruñés nin sequera intentou.

E como pano de fondo, aboia un temor: o de o Gobenro Local querer deixar morrer o modelo coruñés de xestión e tratamento do lixo para acabar derivando os residuos a SOGAMA.