Imprimir

"O que nos preocupa é que o cárcere está pechado, abandonado e camiño da ruína"

BNG | 24 de Xaneiro de 2019

Avia Veira.
Avia Veira.

Avia Veira advirte que ao PP lle interesa “silenciar a memoria da Coruña”, e sinala que a declaración de Claudia Delso en sede xudicial obedece á “xestión nefasta” do goberno da cidade.

"O que nos preocupa é que o cárcere está hoxe pechado, abandonado e camiño da ruína, e que o que move ao PP non é a recuperación do cárcere, senón silenciar a memoria da cidade", dixo Avia Veira, a concelleira do BNG, en relación á información de que Claudia Delso deberá declarar nos Xulgados pola denuncia que presentou o PP contra a cesión do antigo cárcere provincial da Coruña ao colectivo Proxecto Cárcere.

 

A nacionalista recordou que o BNG xa manifestou no seu día as súas críticas ao acordo coa SEPI, por entender que "comprometía ao concello a facer obras nun edificio propiedade do Estado e que Estado debería de mantelo e rehabilitalo". Tamén indicou que o BNG cuestionou o procedemento de adxudicación da xestión do cárcere ao colectivo Proxecto Cárcere, "porque se burocratizou en exceso e existen outras fórmulas, como a do convenio de cesión, máis sinxelas".

 

En calquera caso, Veira insistiu en que Proxecto Cárcere é a entidade máis idónea para ocuparse do espazo. "No BNG cremos que é a entidade ou colectivo máis preparado polo traballo desenvolvido e interese mostrado desde hai anos na recuperación do cárcere". 

 

Finalmente, Veira volveu chamar a atención sobre o estado actual do cárcere, "sen uso, caendo por anacos e camiño da ruína", pero considera que "a declaración en sede xudicial da concelleira é consecuencia desa xestión nefasta da Marea, que non se toma en serio a responsabilidade de gobernar a cidade".

Podes ver este artigo na próxima dirección /articulo/novas/nos-preocupa-carcere-pechado-abandonado-camino-da-ruina/20190124134401008135.html


© 2019 Bloque Nacionalista Galego da Coruña

Bloque Nacionalista Galego da Coruña

Rúa Damas 4, baixo.
15001, Cidade Vella, A Coruña.
Teléfono: +34 981 168 977 - +34 669 381 398
Correo: bngacorunha@gmail.com - bng@coruna.gal - bngacoruna@bng.gal