JORQUERÁ INQUERIRÁ AO EXECUTIVO CORUÑÉS NO PLENO DESTE XOVES 4X

Preguntamos ao Goberno Local que accións emprendeu para obter xustiza para Diego Bello

O portavoz do BNG en María Pita Francisco Jorquera vai preguntar no Pleno do vindeiro xoves ao Goberno Local que accións emprendeu para demandar o esclarecemento dos feitos e a depuración de responsabilidades pola morte do mozo coruñés Diego Bello, asasinado por axentes da policía filipina.

Preguntamos ao Goberno Local que accións emprendeu para obter xustiza para Diego Bello

"Non abonda coa Declaración Institucional aprobada polo Pleno do Concello, a instancias do BNG, o pasado 5 de marzo", afirma Francisco Jorquera. "Haina que acompañar de accións ante o Goberno central, ante as autoridades competentes, para que fagan todas as xestións precisas e exerzan a máxima presión política sobre Manila para conseguir que efectivamente se depuren as responsabilidades ás que houber lugar polo asasinato de Diego. Se iso non se fixer, corremos o risco de que o crime fique impune", considera o portavoz nacionalista.

A presión política ten que ser especialmente intensa dado o carácter "mafioso e ditatorial do réxime filipino", xulga Jorquera e nese sentido lembra a actuación do presidente Rodrigo Duterte durante a crise do coronavirus chamando a policía a matar aquelas persoas que se saltasen as normas do confinamento, "boa proba de até que punto nese país a policía é utilizada como auténticos escuadróns da morte".

Remarca Jorquera que, en resposta ao deputado do BNG no Congreso Néstor Rego, o Goberno español informou de que neste momento en Filipinas hai abertas catro liñas de investigación sobre o asasinato de Diego Bello. "Mais xa sabemos como funciona o réxime filipino. Sabemos que se non hai suficiente presión política esa pode ser a coartada, unha forma de dicir que se está a facer algo, mais sen ánimo real de depurar responsabilidades", alerta o portavoz nacionalista. "A clave está en manter en todo momento a presión política", conclúe.

 

Preguntamos ao Goberno Local que accións emprendeu para obter xustiza para Diego Bello