BARRIOS

Encontro coa veciñanza de Novo Mesoiro para trasladar as súas demandas

Monica Calvo (esquerda) e Avia Veira nun momento da reunión mantida no despacho da asociación veciñal
Monica Calvo (esquerda), Presidenta da A.VV., e Avia Veira nun momento da reunión mantida no despacho da asociación veciñal

A veciñanza de Novo Mesoiro ten propostas para a mellora do barrio que son xustificadas e inaprazábeis. O abandono do barrio veu xa desde o comezo da súa construción onde se obviou a dotación de servizos. E isto debe ser mudado

Mantivemos onte unha reunión coa entidade veciñal da que trasladaremos varias iniciativas, comezando cunha batería de preguntas do por que a reforma dos locais municipais da rúa Ribeira Sacra vai ser parcial

Estase a perder unha oportunidade de facer unha obra completa e integral, que valorice a zona e que dote de máis servizos ao barrio, polo que entendemos porque se adía a reforma dos tres locais conxuntamente

Encontro coa veciñanza de Novo Mesoiro para trasladar as súas demandas

Mantivemos na tarde de onte unha reunión coa Asociación Veciñal de Novo Mesoiro onde nos trataron as distintas reivindicacións que a entidade ven reclamando nestes últimos anos.

Deste xeito, unha nova liña de bus que conecte o barrio coa zona hospitalaria e a Universidade, a construción do Centro Integrado de educación, a realización da segunda fase do corredor entre a rúa Fragas do Eume e a rúa Ribeira Sacra, os servizos no Centro Cívico, coma poida ser os servizos de Ludoteca, ou a reforma dos locais municipais da rúa Ribeira Sacra foron, entre outras moitas, as demandas que nos trasladou a presidenta da entidade Mónica Calvo.

Nesta reunión lembramos as distintas iniciativas que xa temos trasladado a respecto do propio Centro Integrado de educación e o Centro de Saúde ao Parlamento de Galiza e nos ofrecemos a presentar propostas de mellora para o barrio no propio Concello da Coruña a respecto daqueles servizos de competencia municipal, tal e como xa fixemos coas emendas (enlace) aos orzamentos de 2018, na que levabamos unha partida de 150.000,00 euros para o remate definitivo da 2ª fase do corredor entre a rúa Fragas do Eume e a rúa Ribeira Sacra, ou outras sendas por valor de 100.000,00 euros, en melloras en seguridade viaria.

“A veciñanza de Novo Mesoiro ten propostas para a mellora do barrio que son xustificadas e inaprazábeis. O abandono do barrio veu xa desde o comezo da súa construción onde se obviou a dotación de servizos. E isto debe ser mudado”, sinalaba Avia Veira na reunión.

Neste sentido, xa esta mesma mañá presentamos unha batería de preguntas ao Goberno municipal (podes descargalas aquí) a respecto do por que só se van reformar dous dos tres locais de titularidade municipal do barrio.

Esta reforma, valorada en 241.610,43 euros, só comprenderá dous, e non os tres locais situados na rúa Ribeira Sacra 15, 17 e 19, cando, ademais, esta demanda vén sendo solicitada pola veciñanza deste barrio desde hai anos, propoñendo para o aproveitamento destes espazos, entre outras cuestións, que se estableceran actividades e servizos derivados do Centro Cívico, que se creara unha aula informática para o uso e gozo da veciñanza, dotar dunha sala de reunións para actos públicos, reunións de comunidades de veciños, presentacións etc.

Asemade, a proposta veciñal salienta que a reforma suporía unha revalorización desta zona do barrio, por canto dar uso a unha infraestrutura en estado de abandono durante todos estes anos, e xa que logo, por establecer unha serie de actividades permanentes que daría lugar a unha maior presencia de persoas, sobre todo pola súa localización, no corredor entre a rúa Ribeira Sacra e a rúa Fragas do Eume, que aínda ten pendente finalizar a súa urbanización. En definitiva, a reforma destes locais serviría para dotar ao barrio de máis servizos. Por tanto, cremos que se está a perder unha oportunidade de facer unha obra completa e integral, que valorice a zona e que dote de máis servizos ao barrio, e non entendemos porque se adía a reforma dos tres locais conxuntamente.

Deste xeito, solicitamos que o Goberno municipal explique por que só se vai realizar a reforma de dous dos tres locais municipais, e non se realiza unha obra completa e integral e solicitamos, tamén, que se aclare que servizos ten pensado dotar o Executivo unha vez sexan reformados definitivamente estes locais

 

A Coruña, 8 de febreiro de 2018.

Encontro coa veciñanza de Novo Mesoiro para trasladar as súas demandas