O BNG critica que o custo da cabalgata ascendera a 365.000 e os gastos do Nadal a 1 millón

BNG da cidade da Coruña 30 xan. 2014 - 16:30

bng da do cabalgata millón critica

A Coruña, 30 de xaneiro de 2014.- Despois de ter acceso ao conxunto do expediente, a concelleira do BNG María Xosé Bravo denuncia que a cabalgata de reis ascendeu este ano a 365.000 euros, entre os gastos da propia cabalgata e mais o aluguer das carrozas que estaba licitado en 91.960 euros e que finalmente foi adxudicado por 79.860 euros (o aluguer das carrozas do ano pasado ficou adxudicado por 51.919,01 euros). Isto supón que o custo global do Nadal superara a barreira do millón de euros.

A concelleira do BNG critica o alto custo dun Nadal ostentoso que en nada concorda coa situación de crise que padecemos nunha cidade galega en que máis medrou a pobreza (os últimos datos do IGE sinalan que a taxa de pobreza aumentou na cidade un 70%). Os 365.000 euros que custou a cabalgata súmanse aos máis de 135.000 euros que custou o poboado lapón e aos 563.350 euros dos gastos en iluminación. É dicir, máis de 1 millón de euros. Para o BNG o excesivo gasto de Nadal responde á política de pouco pan e moito circo do PP na cidade da Coruña, que non tivo reparos en gastar máis de 2 millóns nas festas de María Pita.

O BNG denuncia a insuficiente puntuación técnica da proposta da empresa que resultou adxudicataria

Pola outra banda, despois de acceder ao prego de referencias técnicas do aluguer das carrozas, a concelleira do BNG revela que a empresa adxudicataria, a única que concorreu ao concurso, obtivo unha puntuación técnica claramente insuficiente. E é que no referente ao criterio de características estéticas, a empresa gañadora sacou 2 puntos dun máximo de 8 e seguindo o criterio de melloras, só conseguiu 1,75 puntos dunha puntuación posíbel de 4. Isto significa que dun total de 12 puntos tan só acadou 3,75.

O BNG criticara con anterioridade que o Goberno do Sr. Negreira tramitou de forma urxente este concurso e reducía de 10 a 8 os días en que se podían presentar as propostas. Finalmente, só unha empresa, a adxudicataria, se presentaba ao concurso.

As cifras da cabalgata

Animación cabalgata: Spheres: 11.676,5 euros, Juguetes Kull de Sac: 7.381 euros, Les jous volantes 24.865,50 euros, Jouets: 15.730 euros, Pasarrúas Manicómicos: 32.080 euros, Notas musicales: 47.371 euros

Persoal:7.262,88 euros

Decoración: 20.872,50 euros

Varios (Visita reis magos, speaker cabalgata, deseño camisetas, transporte nenos participantes, enganches, asistencia técnica control de elaboración de carrozas): 28.680,51 euros

Varios (valados, carpa, haimas...): 19.658,89 euros

Aluguer seis trens: 14.701,50 euros

Luz, son e audiovisual: 18.440,40

Caramelos: 17.160 euros

Camisetas: 7.744 euros

Outros gastos (pulseira, chubasqueiro, chocolate, catering): 10.834 euros

Seguridade: 527,95 euros

Aluguer carrozas para a cabalgata: 79.860 euros

TOTAL 364.846,63 euros