A Coruña, 07 de xaneiro de 2014.- O Grupo Municipal do BNG denuncia que a adxudicación do aluguer das carrozas da cabalgata aínda tivo lugar na mañá de hoxe, ás 09.05h, dous días despois de que a propia cabalgata percorrera as rúas da cidade, tal e como reflicte a páxina web do Concello. E isto, a pesar de que o Goberno do Sr. Negreira, tramitou de forma urxente o expediente do concurso para o aluguer das carrozas. O Bloque xa criticara que, ao tramitar o concurso de forma urxente, o PP reducía o prazo de presentación de propostas de 10 a 8 días. Finalmente, tan só unha empresa se presentou ao concurso.

Pola outra banda, o BNG volve denunciar o custo excesivo da licitación do aluguer das carrozas, que este ano ascendeu a 91.960 euros, un 40% máis que o aluguer das carrozas da cabalgata de 2013 (licitado en 65.000 euros) e un 160% máis que no anterior mandato (licitado en 35.000 euros).

ANO          LICITACIÓN                ADXUDICACIÓN           ADXUDICATARIA

2009         35.000 euros                     34.750€                 Alberto Salas Costas

2010         35.000 euros                     34.750€           Mª Elisa Iglesias Santomé

2011         35.000 euros                     31.234€                  TEMAGAL, S.L.

2012          63.000 euros                    62.498,97€            Carlos López Ríos

2013          65.000 euros                    51.919,01€        VS1 Producción Creativa S.L

2014          91.960 euros                    XXXXXXXX      Ouri Producciones Artísticas, SL

O BNG anuncia que pedirá acceso ao expediente da cabalgata de reis para coñecer por que importe foi adxudicado o aluguer das carrozas e para darlle a coñecer á cidadanía a canto ascendeu o custo total da cabalgata. O ano pasado, tal e como recoñecía e edil de Cultura do PP, a cabalgata custou máis de 200.000 euros.